第十六屆香港運動攀登公開賽

我第二次參加攀石比賽，上午8點10分已經到達順利材運動場，我係309號選手，賽事分為初賽及決賽，我果組共有38人，頭12人可以入決賽。

當換好件大會T-shirt 後就要入去選手等候區，等到10點我地一班新人出去攀石場觀線，當一睇到條比賽線，心都離埋，嘩，要"之"字型上到13m頂，我都無睇最高果d位，事關我應該去唔到咁遠，所以我集中注意力係頭果6-7個hold，觀線時間得6分鐘，我們好快又返入去等候區內。

到大約10點15分左右，就輪到我出場，一如我所料，我輕鬆地完成頭7個hold，正想上第8個hold 時發現無腳位好踏，平衡唔到個人，所以我駛出"四方形"平衡法，雙手捉住第6、7hold成正方形狀，仲要曲手定住個人，你話死唔死！最終因為支持唔住fall左，而攀爬高度得6m。

落到黎返去觀眾席，諗住走人，點知瑪利亞話之前所有賽手都去唔到第7個hold，叫我睇埋其他賽手可能有機入決賽，而我個朋友仔阿kent佢係317號，佢和我都是在同一hold度fall，而除了兩、三個特別彪青外，大多數都係去到第6個hold。不過有位選手就最慘，因為佢無睇清楚，起步時隻腳踏住個唔係指定既hold，所以佢係一出場，隻手仲未去第二個hold就俾大會裁判foul左！

到大約12點15分左右，新秀組初賽經已完結，我同阿kent估計都應該可以入到下午決賽，但又未出成績，所以我地一行四人帶著忐忑心情去大家樂食飯。

食完飯，1點左右我地又返去場館睇成績...結果係...

結果係有6個人攀到7號hold以上(包括一個上到頂)，而有7個人只係去到7號hold(包括我同kent)，共13人，你話點算？

好好彩，大會俾所有去到7號hold既人入決賽，我地就好興奮咁入去賽手等待區，因為我覺得真係
好似得到bonus一樣，可以玩多一次！

有了上午既經驗，決賽觀線時已經多了些信心，應該可以攀得高d。今次由阿kent出賽先，佢排第四而我係第七個出場。

又到我出場喇，因為只得一次寶貴的機會，所以我決定要好小心咁攀，觀線時諗住用右手伸上去捉住第三個hold，但點知落到場，個hold原來俾我估計中遠左少少，我應該要再踏高少少對腳，之後先伸手，但我驚咁早就要fall，所以我採取一個較穩紮穩打既方法，轉用左手去捉，hold 是捉緊，但要在同一個hold上轉手，有少少"論盡"，但終於都過到。

當我仲好有力咁向上攀時，但突然聽到有把聲從下面傳來，"309 落黎"，嘩，有無搞錯，叫我返落黎咪即係要foul我，我做錯左什麼？原來攀石比賽d選手仲慘過跆拳選手，因為我俾人foul左後，個裁判都無話我知衰邊"飯"，眼光光就走返觀眾席。

事後瑪利亞話佢都睇唔清楚，但應該係話我隻左腳接觸到個非指定使用既hold。不過我好肯定我隻左腳係無用果個hold借力。我覺得好唔抵，因為我仲好鬼有力，可以繼續向上爬，而且係我觀線時，感覺上係可以爬高d架！但宜家都係去到6m左近。

不過，一切都係我錯，我應該要睇好對腳踏既位置先好上手，唔可以話裁判判得嚴。而呢樣野，係我玩左咁多年跆拳學返黎。正如跆拳比賽平手，結果裁判判你輸，你就唔應該話裁判有問題幫對手，如果你咁叻，唔使平手要裁判決定啦，KO對手裁判仲易做。

總結今次比賽，雖然決賽時俾人foul左(有少少唔甘心，不過事後知道阿kent 都係爬多我兩個hold，而且瑪利亞仲兜口兜面同我講，你都唔會叻得過阿kent喇，所以如果無俾人foul，照理都只係可以爬多兩格咁大把，唔好放係心度，佢咁樣"安慰"我)。

但我覺得已經賺左喇，因為自已初賽時表現真的未如理想，但幸運地又俾我入到決賽玩多一次，真的很開心，這是一次很好的公開賽經驗。

後記： 是次比賽報名費$100，比賽當日，幫我報名比賽既攀石會教練俾了封利是我，話利利是是祝我好運(不過佢係當我初賽時fall左落黎，好失望咁行返去觀眾席時俾我的)，嘩！拆開黎睇，有成五草野！即係話我50蚊可以玩成日比賽仲有件幾ok既T-SHIRT，正斗！如果我地陳sir識咁做就very 骨！