再去東龍島

28.8.05 (星期天) 多雲間中有陽光

終於又有機會去東龍島爬石，今天約咗騎雲同阿星一齊去，我地搭11點班船，我10點4個字就去到油塘MTR。

一出地鐡站，就見到一個好似 Samy既人影，急急腳咁行落樓梯，我一個箭步去睇吓係咪佢啦，
果然係 Samy，佢平時會搭10點船，唔知幾時學咗我地咁懶呢？

今天阿華，Kent 同 Vienne都冇到，阿華出發前打俾我，話有事，唔嚟得，大忙人阿 Kent 就話自己唔舒服，但我聽得出佢應該係唔知醒，Vienne 就返咗大陸玩，下星期尾先返！

好重呀，都好耐無背住咁重嘅袋行山，今天唔係咁多人搭船，可能我地搭遲咗一班船，大多數遊人都會早入。很快就到達東龍島碼頭，

一行十幾個爬石友一齊行去石場，而行在我後面，就係世界速度賽排名前十名，香港爬石高手，黎志偉，即係凌石抱石場主持人，佢仲同我爹咗兩句，都幾光榮吓！

行到去假日士多時，因為實在太熱，已經全身濕哂~~

去到石場，吓！竟然得小貓10數隻，大小 ceiling都冇人爬，啲人集中在高手線區！

我立即開繩Lead條小 ceiling，嘩，唔掂，太耐無爬天然場，動作好生硬，因為大風，石牆都濕濕地，所以都幾驚 fall，另外加上緊張，所以爬得好用力，隻腳又幫唔到，齋用手力，去到 ceiling底時已經冇晒力，自己又唔記得下個 hold係邊，最後 tension咗係 ceiling底，苦~~

之後阿星同騎雲提番我啲 move，我都上到去！

佢地一個一個咁爬小 ceiling，而我就開多一條難度5既線俾D女仔爬，中段時間，我去爬咗條大手印，之前我都 lead到上頂，今天 top rope算數。不過我今天信心不大，可能我正處於低潮期，
要重整一吓身心狀態！

其實呢條線啲 move 大約我都記得，當我去到 crux位時，我左手捉住一個手指 hold，右腳踢出想踩住一個淺腳 hold，但突然踩唔住，成個人靠晒左手隻手指 hold住個人，吖，又俾我捉得實，右手立即拍到個大 hold，然後慢慢搵腳位，終於 top 到上頂！攞番少少信心，原來我咁大力。

差不多三點半，可能 Samy 發現我呆坐在小 ceiling附近，所以專登叫我過去佢樹，爬一條7A嘅叫大坑渠，其實之前我都爬過一次，不過去唔到第一個Crux就Fall 咗。

今次Samy爬了一次及用粉拍在石上做記號，等我可以好清楚跟住嚟爬，另外我係 top rope 爬，
而佢驚我 fall 時碰撞到隔離，所以又幫我扣了兩個 quick draw，佢真係好好人，好教練！

我今次好用心去睇佢爬，每步都有睇，但唔係每步都記得！而且當我爬嘅時候，Samy都有些重點提示，所以我可以順利去到第一個 crux位。

在我記憶中，Samy左腳首先踏去左邊一個淺圓形腳 hold，之係換右腳踩同一個 hold，而左腳就唔知踢邊，咁左手又唔知點樣拍吓拍吓，就見佢好輕易就過咗呢個 crux。

當時我雙手攞住手指 hold，但當我隻右腳踏住 foot hold時，左腳都唔知擺得去邊？
樓下既 Samy 叫我踩高啲，有一個凸出腳位可以用。我第一次踩上去時，嘩，真的咁高，好 high step 喎，當我夾硬踩住之後，Samy 叫我將個人移去左腳做 one point，攞上面個 pocket位！

可能我唔知道個 pocket位其實喺邊，我只係 哦~~ 哦~~
話知道，其實都係爬到上咗去先算，我左手拍到條邊，但隻腳並未準備好做 one point，所以發唔到力上去pocket，fall 咗，不過比上次有所進步！

第二次做番個 move，就一 take 過！
原來個 pocket 真的很深，可以休息一吓。

之後又嚟一個 high step，呢個 move 就好似 KPCC 爬 D仔黃色線，有一步又係左手手指 hold ，右腳 high step 加 one point上雙波，側身右手上單波！石場既動作真係可以在天然場用得著，近！

不過天然場做嘅時候就驚好多。

因為係之前 crux位用力過度，到最後一個側身大 layback上左手拍頂動作，又 fall 咗多次，
無所謂啦，因為我已經享受了呢條線既樂趣，好好玩~~

落地時，阿星同騎雲話我好叻，爬到上頂，我有少許唔好意思，都係 Samy 之前既示範同從旁指導啫！

離開時約咗阿星，下次一齊玩吓石場左邊較難既線！

我都要努力練習~~