又set咗條新線

呢個星期工作方面都幾繁忙，但昨天是三月份最後一天，而且是Happy Friday，所以提早點放工去KP。三月份真是幾難捱，完全是工作月，冇任何假期，仲有成30日，叫救命~~

單地晨早就SEND咗隻E貓俾我問我會否去爬石，梗係爬啦，唔知點解，呢個星期我爬日、一、三、四、五，但爬時都唔係感覺到真係好攰，而且仲可以爬到d 6c or 7a 線，當然唔係一次爬到d 7a線啦！

我5時30分就去到KP，見到單地同小狗正在爬緊石，我那那聲換衫一齊玩。
吖！有件事真係要提一提，就係瑪利亞竟然留係公司睇漫畫唔陪我早點去KP爬石，佢話佢好鬼攰，點都唔會早到，要成7時先到！
OH~~佢咁忍心要我一條人係KP吹風，好彩有單地，唔係真係齋bouldeer。

我又再次以Samy set 既C板藍色線作為我熱身，單地負責做belayer，我一路lead都好鬼死順利，終於去到第一個crux位，我搣住個灰色細hold，有少少off，仲要上好腳才可以攞埋隔壁個hold，但又俾我攞住！

吓~~吓~~吓~~
又爬到ceiling底，今次我唔心急，我係ceiling底換吓手休息咗一陣，之後才上ceiling，甩左手捉住個手指hold，左腳one point咗，呢個就係最關鍵時候，成功與否就在一刻，我大叫一聲“吖”右手食指中指齊齊插入頭頂個HOLD，好嘢，上埋右腳，入扣入繩，心諗今次仲唔掂！

但我要保持冷靜，因為只差2米，唔可以Fall，慢慢好穩陣捉到下個hold同再下個hold，最後攞住end hold，雙腳一伸到頂，嘩~~

勁呀！終於lead到Samy條線，至少有6C+，而且係我自己入扣㗎，俾自己一個叻！雖然係遲咗D先lead到，但我已經很開心，因為我所花的時間、血汗、練習係冇白費的！埋緊我都會lead呢條線做熱身~~

唔好意思，因為太高興，所以寫咗咁耐都未入正題！

昨晚除了lead到條線外，還有件開心事，就係再次做定線員，
今次我用R同S板set線，依然都係俾女仔爬，因為我鐘意同女仔玩，哈哈~~
我今次只用呢兩板，唔似上次咁長， 6A左近，手可以摸牆，主要係bridging，一開始頭兩個hold之後就無hold，要推牆做bridging上三米，之後爬多2米又冇hold，問你點頂！然後要出ceiling，不過有幾多大手抽俾人用，唔使擔心，一定過到。最後又要黎多次推牆先可以到頂！

set完之後，試線員一號阿華第一時間top上去，呢條又點會難到7A華吖！佢好輕鬆就爬到上去，但佢試完之後話有幾步對女仔嚟講都幾難，話都有6A架~~
佢可能係嚇吓下一位選手“瑪利亞”，佢緊接阿華又試吓呢條新線，bridging對佢嚟講簡直毫無難度，輕輕鬆鬆過咗頭幾米，直牆少少手指hold也話咁快就過埋。

去到第二個bridging位就有少少QK，其實有兩個方法過，一係lock住個人唔做bridging，就咁dynamic去下一個hold；另一個方法就係在無咩fissure可以揸情況下做bridging。

佢因為on-sight關係，所以選擇了穩陣方法bridging，伸盡晒兩手終都過咗呢一段路。

去到ceiling底，瑪利亞盡顯女子力王本色，手抽拉手抽，重心轉移，側身兩腳勁力一伸抽身而上，又俾佢過咗超難ceiling，可說是一時無兩！

終於只剩下2米overhead位，佢左手揸住個大hold，但眼見下一個係好鬼遠既右上方，她只好鼓起勇氣，又一次dynamic拋上去，嘩，唔到，只係摩到HOLD底，但佢冇FALL到，仍然握住左手hold不放，去到尾段點可以輕言放棄呢，似我。

就在此時，突然俾佢見到仲有一個近D既hold，佢之前miss咗，佢立即“E嘩鬼叫”“HE HE HA HA”，好鬼開心就過埋最後幾個HOLD，終於on-sight top rope到我條6A新線，叻囡呀，恭喜~恭喜~~

爬完之後，她大讚呢條線好玩，最緊要係啱啱俾佢on-sight到，又唔太易，我聽到佢咁正面既爬後意見，我作為定線員都感到安慰！

定線員 - 新牌仔

星期三晚一如以往去KP爬石，呢輪爬開SAMY條藍TAPE線，仍然係去到Ceiling底就唔夠力，要大叫tension。

當晚冇咩人爬石，samy正在教班，但只有2名學生上lead。之前samy 提議我可以tape條線玩吓，好啦，今晚見人少少，tape條俾女仔爬吓，要容易！

所以我就係o板開始定線，原來做定線員都唔容易，要諗好多嘢，因為係第一次tape，所以冇咩方向，只是諗住要有腳hold，唔要手指hold，冇難crux，6a左右！

Tape線既時間，我會自己試吓d move，所以又上又落，諗來諗去，d女仔爬唔爬到呢？但最終都好快完成咗條線，主要是one point 同high step！

我自已第一個試線，冇摩粉一次過top rope上到頂，平心而論，其實都俾咗幾多靚hold 女仔用，應該可以應付得來~~

第一個選手係瑪利亞，佢好順利去到頭果3米，但可能在我定線時冇考慮到其中一步，有兩個hold對女仔黎講係比較遠咗d，所以佢試咗幾多次，貪盡晒個人都攞唔到下個hold，所以由佢改咗第二個hold，其實改咗之後都唔易咗去邊，不過佢就夠長攞到。之後佢一路向上爬，平平安安到達終點，勁呀！

之後又到我lead呢條線，都係好輕鬆就完到，其後我地修改咗少少，減少咗三個手hold同埋唔准用feature，增加少少難度！

由於時間關係，其他女仔就冇機會試玩，下次啦~~

第一次定線都幾好玩，下次要學吓set條有唔同既move同crux先得！

走雞~~

搶唔到呀~~
哎呀！撞到正，撞到正一正！
今年搶包山將會在4月29日(星期六)舉行初賽，5月6日正式比賽。
咁係咪撞正我地去krabi日子，頭尾包到實，連去初賽玩玩上吓報紙機會都冇~~
算數，休息一年，出年再戰包山！

而尖咀y記比賽，收到風，應該會係我地krabi返黎之後，5月中搞。好彩~~

又有比賽喇~~

又有比賽喇，今次仲一次過有兩個比賽！

MU係三月搞bouldering比賽，而四月就輪到難度賽，我梗係第一時間同mike蛇報名，繼續以“健域之友”身份出戰。

我都餓咗好耐冇比賽喇，原先報咗一月份係gonature boulder 比賽，但因為1月1日腸胃炎加勁偒風，搞到去唔到比賽，冇咗$100報名費。我都係同gonature有咩緣份，上年定係前年，我都有報名佢地搞既比賽，晨早由屯門去到觀塘，不過當日落狗屎，收消比賽 ~~
如果下次佢地再搞比賽，我都係要諗吓先喇！

為了三月底boulder 比賽，上星期日，我約了一班朋友仔，專登唔出山，去咗屯門凌石場練習。都有一段時間冇去，貪果樹地方夠大，人流又小，d線又好玩！

之前一晚已經打咗電話俾負責人，問佢星期日個場開唔開架？佢話冇問題，有人係度架，如果冇人就打俾佢啦。

星期日飲完茶，就剷上凌石，嘩！裡面得一條人玩緊 ~~

tape晒8隻手指後就開波爬石，玩吓d 6a 線，on-sight咗一d，雖然有d玩唔到，但係條線set得幾reasonable，冇climberland咁力同手指hold！但一去到6b線就難好多。

爬到4時半走人，返屋企打派，elaine姐又贏錢喇 ~~

之後入咗元朗食大榮華，$48一隻五味雞，抵，爆醬脆鱔，好味~~
但豬油飯同炒蛋就唔多掂，d炒蛋勁咸，碗飯細碗又漏單~~

上年尖咀Y記係四月頭搞咗個比賽，唔知今年佢地會唔會搞呢？
而今年搶包山又就快報名，唔知會否又撞咗去krabi 日子呢？