停電？！

尋日在家由中午做到五點左右，終於完成手頭工作。

興之所至，同瑪利亞提議去凌石boulder......

我地立即飛的去健發工業大廈。去到門口，按門鐘，發現冇人應，我仲搵隻耳仔貼埋門偷聽，zzzz......就係呢一刻，瑪利亞話俾我知，度門俾人從外面鎖住咗！

嘩啦啦~~~小丙！有無搞錯呀，次次去到都有人係度，點解今次會咁？

我立即打電話俾海洋，搞咩鬼呀？oh......原來佢話當天停電，是日休息！

慘人是我，又要休息喇~~~

今日好好彩！

頭先去 毅X 買 tape 同個練手指嘅波波，唔知係咪減價，定我記錯價錢，卷 tape 上次賣$40，今次$30！

算數啦，幾錢都唔緊要，因為今次卷 tape 有人送~~

事關我遇到一個倒米 sales！個波波定價$150，我問個 sales 有無折，佢話 vip 有85折，計咗我睇即係$128，連埋卷 tape 就係$158，我身上無咁多 cash，所以我問佢收唔收 card，佢話要買夠 $200 先有得簽，我再問可否用 eps，佢就話無問題。我俾咗佢過數，入埋密碼，佢入咗波波同卷 tape 落個袋仔度，俾番張銀行機單我，我仲行咗一陣先走，後尾喺條街度，諗吓諗吓，好似唔對路，搵番張EPS單出嚟一睇.....

......才發現，個sales只係計咗波波錢，即$128咋！第一次喺毅X 買嘢有嘢送，鬼叫佢地平日咁孤寒，抵！