第六名

終於比賽完，真係好玩，不過好鬼攰~~~

是次參賽者只得9人，過半數均為年青boulder 好手(不包括我在內)
我今次可以end 到一條，另一條拍到end holder fall咗，其餘三條連bonus都摩唔到！
最後排第六.....不過都有一大袋紀念品！
又一次發現自己攀爬能力不足，推動我不斷向前！

YMCA Bouldering Contest 2008

下晝就係比賽既大日子，
今次應該係第三次玩Y記比賽，希望d 線玩到啦，佢地set得好難架！
上晝返工無 mood 做嘢，等放工，hea 中！

V5

哈哈，終於知道自己爬boulder既grading喇~~
尋日我和瑪利亞約咗 perry，sarah，阿仁去荃灣蓮花山爬 boulder。

一朝早瑪利亞開車去屯門置樂食早餐，之後佢又駛車出葵芳 boulderland，
我地順利去到葵芳，但由於我老點佢方向，所以我地兜咗一圈，行大運~~
齊人後我地就出發，我架車原來可以放到三張 boulder 墊，勁呀！
泊好車車後就行上山，好耐無行蓮花山，超攰，揸住支 post 都唔掂檔~~

經過一輪熱身後，perry 帶我地去"colin's boulders"，那裡線道比較難！
我地去到時已經有一大班勁人玩緊，有阿鬼同朱仔等....
我試玩那裡一條V5既線道，
頭果三、四次時起步都有困難，
可能上晝玩得落力，兩隻手既手指皮已經去得七七八八，
搣住 d 細 hold，尖 hold 特別痛，但好彩無爆缸，所以仲可以繼續玩~~
之後經高人指點後，就順利由第二個右手手指 hold 去第三個左手搣 hold，
然後要 lock 個人埋牆及伸盡右手上去另一踏踏 hold，
第一次踏唔實個hold，fall咗，但感覺 okay。
如果前段爬得慳力d流暢d都應該可以上高d，

隔咗一陣又上牆，今次又過多幾步，
呢條線好玩在又要做好多move，如 heel hook，有d 似泰國既 tidal wave，
幾啱我咀型，但當我再一次搣住個點點hold，heel 住腳 lock 上去搵個靚嘢時又fall 咗~~
如果俾我攞到上面個靚hold拉到個人上去就end到條線！

我休息多一陣後就再一次attempt，今次知道晒 d move，揸住之前個點點 hold 後heel hook 住，今次仲 hook 得好定，可以作一次小休，最後 lock 埋上去下個靚hold 及登頂， yeah，V5 搞掂！

終於有番個grading，可以同人講我爬到一條V5 boulder 咁大把.....

人工牆d grading 真係難好多， 我係boulderland 而家都係玩緊d “中”or v3樓下...
又要加把勁，黎緊每星期都有比賽！

很快2008年就去到尾聲，我要為2009年 Rock trip 做好準備~~

黃金場

續上回，

大眼跌咗對波鞋落山，佢只好又爬番落去搵鞋！
隔咗一大段時間都未見佢上番黎，以為佢對鞋實轆咗落山腳！
點知佢又死好彩，對爬石鞋竟然掛咗係樹頭，俾佢搵到~~
我地終於可以開波爬石喇！

由於出發前大眼只係叫我帶繩，所以我帶了條40m，
但去到才知道要用60m繩，不過我條繩都好有用，
阿鬼將條繩set在兩個anchor，做belay時可aid住條繩安全d~~
石場上只有三條線，但阿鬼同大眼認咗一輪才確定每條路線grading，
因為佢地都係隔咗好耐無黎爬，唔係好記得邊條線打邊條線！

阿鬼一馬當先開條7b+“yellow direct”，
事關佢問邊個爬先時，我地三個立即唔望佢dead air........

黃金場果然係硬嘢，條7b+真係好難，因為好耐都無人爬過，
完全無粉位，見阿鬼lock住手勁搵hold，真係不得了~~



輪到我試，top rope 前半段，尾段aid住lead埋佢，
細 hold，勁要做move，aid住過crux，揻爆手指流血，但好玩~~
今年搵日再試！

大約5點半收皮落山，呢吓先甘，全程下坡路，又斜又危險，天又開始黑，
認真攞命！

最後返落山嘆番罐冰凍可口可樂，ha.....正

飛鵝山“金場”

11月16日(星期日) 勁曬

星期四大眼相約我一齊去飛鵝山金場爬石，
由於山路難行及該處線道最低消費7b，
所以佢講明只招待男賓~~
開頭諗住入東龍，所以冇答應佢去。
但星期五晚見到個月亮超圓，東龍都應該大水，
而瑪利亞也想抽空到我公司搵搵旅行資料，
所以佢就放我一條人去爬石~~


除了我同大眼外，仲有阿鬼同黑仔，
但黑仔臨時病咗，由boulder 人阿峰頂包，
四條人食過早點便打的到飛鵝山道一號豪宅，
大約9點半起步上山，向上爬升咗超過45min，
中間休息咗兩、三次，越向上行山勢越難行！

終於去到金場位置，但要去到爬石地方仲要solo一段仔，
阿鬼打頭陣上去 set 條 safety rope 俾我地有需要時拉住，
之後我地逐一爬上去，首先係阿峰，之後到我，
由於我條繩用咗去做safety rope，我就孭住大眼個背包，
我改穿了爬石鞋才爬上去，如果著住對涼鞋一定轆落山~~
大眼先生孭住阿鬼個重量級背包準備爬時，
我地大叫等陣，由於山勢險要，提議佢都係著番對爬石鞋好d，
所以我把佢對爬石鞋釣落山俾佢，
好快佢就爬咗上黎爬石同belay地方，
但原來佢中途曾經把掛住在背包上的波鞋跌咗落山邊，
由一“好心”行山友發現並幫佢綁在繩尾，
當大眼拉番條繩上黎時，綁住波鞋個結突然鬆咗，
對波鞋又跌咗落山不知所蹤！
莫非大眼要著住對爬石鞋落山？

欲知後事如何，請看下回分解~~

Peter 不見了

Peter 是我係2004年年中在ymca 尖咀爬石牆識的一位外籍朋友仔，
亦都係我一千零一位老外朋友，
佢係某大電子品牌公司高級職員，老遠從瑞士到香港打工，
由那時開始一齊爬石，由係尖咀爬石到去健域學lead，
再到kpcc玩，一齊去陽朔、krabi！
但不知何故，佢係2007年我地一齊去完krabi爬石後就人間蒸發，
電話飛到留言信箱，公司及私人 email 都唔回覆~~
他是否已經去了另一國家打工？
Peter ，如果你見到此文章，請與我聯絡~~

再戰歐洲

從西班牙及意大利歸來後數月，
因忙於買車、整車、改車事宜，搞到把爬石活動暫放開一邊，
現在車車大致改裝完成，未整既都因為價錢太貴，
及想操熟d部車，費事整完冇耐就撞爛撞花，灑錢之餘又心痛~~

爬石呢個運動，真係唔可以有一刻偷懶，
如果唔keep 住練習，d功力係隨時間而流逝，又要花很長時間才可以追回來~~
有見及此，為增加自己爬石原動力，我又相約了歐洲爬石隊員：大眼先生和 elaine 姐，計劃出年再戰歐洲爬石！
經過上次十八日旅程，大家總叫夾得黎，及冇反面收場。
另外，很喜歡驅車到歐洲超正既爬石區盡情享受，爬石地方又大又多線，環境靚到爆燈，所以我地又有共識出年再去歐洲爬石加旅遊~~

地點初時定為德國爬石、瑞士觀光，但後因考慮到所選的德國爬石區線道比較難及全插手指，可能暫時未夠grading玩，而且我地諗住出年三月尾出發，請最少假玩最多日，那段時間德國仍然氣溫較低，日照時間也較短，冇咁抵玩！

所以而家暫時改去法國南部另一出名爬石區，連爬十天。
那裡線道比較長，大約超過20米，少d耐力都唔得，所以現在同大眼在kp苦練，希望出年享受爬石樂之餘也可以爬出少少成績來~~

除爬石之外，我地亦都照顧到團友觀光既需要，我地特別加插了巴黎一天遊，
滿足了elaine姐一直想去巴黎既願望！
而且我地將前住世界最後一片樂土“瑞士”並遊覽美麗既三角朱古力山等....
今次大家都要襯早儲定錢，好在經過金融海嘯影響下，
歐元對換價從年中既12.5回落到10蚊樓下水平，希望跌穿9蚊~~
到時去歐洲又入返條mammut 繩先！

倒數時計：仲有四個月~~