Snatch & Run

特別新聞報告，
上星期日11月27日，大約中午時份，
在畢架山上發生一宗搶劫案件！
於上述時間，一班大約十多名攀石愛好者正在畢架山上進行戶外攀石活動，
突然有一班為數幾十個“山賊”從山腰湧上山頭，
個個張牙舞爪，全身赤條條，周身毛，十分可佈！
其中有些爬到樹上監視，有些發出怪叫引開各爬石人注意，
而有一名賊仔乘各人唔為意，慢慢行近石磨男背包位置，
一手搶走我個密實袋，
oh，my god !
我袋內放有黃金萬兩，武功秘笈十套，一條60m 攀石繩，4個gri gri，8隻快扣，兩條安全帶及一些個人衛生用品！
損失慘重，急需援手，多多益善，聚沙成塔，救救小磨男....
即打捐款熱線與磨男聯絡！

無聊

上星期六因為聽咗“美好”講去咗深井食燒鵝，
點知又貴又唔好食，回水啊~~
最慘係回家途中被深井風吹倒著涼！
病咗差不多一個星期喇，都係果個“美好”....xyz!?$

KP 因為下星期舉辦一個大型亞洲青少年爬石比賽，
所以會封場一星期，期間將會把攀石牆改頭換面，有可能轉過晒d holds，
比賽之後又要辛苦一班教練重新set 過d 顏色線！

星期二晚去到KP，見到A、B牆已經有些顏色轉咗holds，
而且有多位港隊高手正在 set 緊線，好不熱鬧！
我地只好玩吓圓柱體既線，但越來越多人，又冇咩好玩，
只好早點食飯歸家。

昨晚又去過KP，今次終於少番d人，但仍然無咩 mood 爬，
只係試咗d高手所set既線，但超難，條條7c以上，
crux 連續不斷，一步一A，但最多過到8米都係放棄，費事整親手仔！
之後走咗去C牆玩條淺藍色7b，
嘩！竟然俾我拆晒d move，去到ceiling底先第一次fall，
而且好輕鬆地一次過過咗之前拆唔掂既crux，奇呀，咁我係咪勁咗呢？呵呵~~

今個星期日去唔到東龍島，不過都冇所謂啦，如果山長水遠入到去爬唔到仲慘，
而家去beacon hill 又方便d，不過belay地方就細d。
希望唔好咁多人啦，但聽騎雲講有人開班上rock，不知點算好....

明年一月八日gonature搞boulder比賽，
但係佢地網頁仲未有報名表下載，
都未去過佢地新場，試吓都好！

無聊的人

黑仔星期三

好痛呀！
尋晚係男士黑仔之夜，我同阿華相繼整親。

故仔由這時開始......

因工作關係，可以提早放工，
所以昨天我五時三十分已經到達KP，
MARIA 同 AMY 又話早到，吹晒水，
佢地六點幾先慢慢行到，我已經等咗一粒鐘。

星期一SAMY set 咗條紅色線，
一心諗住試吓啦，
點知我都過唔到個ceiling，
出ceiling對我黎講，真係唔多掂，
雙手好快就無力，又唔敢鬆手去下個hold！
怎麼辦？

爬唔到，惟有爬其他嘢啦，
之後走咗去爬條7a藍色線係panel o，
其實之前我都差不多top rope 完到呢條線，
可能就因為咁樣，有少少輕敵，
爬吓爬吓，終於到咗整條線唯一個crux位，
我幾經辛苦左手捉得實個手指hold，
右腳踩住個點點feature後，
右手申向右面捉到另一個比較好揸既手指hold，
然後應該做好隻右腳去一個好踩既feature上，
再做左腳one point 去左手hold；

但可能因為之前浪費了很多氣力同時間在左手手指hold上，
另外，心諗已經過了最難既crux位，應該無問題，
所以心裡一放鬆，就出了亂子~~
我竟然無做好隻右腳，就夾硬黎想做one point 落隻左手hold，
隻左腳係咁提高，但點都踩唔到個左手hold，
同時間，隻左手手腕就勁lock住，
lock 得一陣間，左手前臂突然傳來一陣劇痛，
噢！最終拉痛咗前臂，嗚嗚嗚嗚嗚........

而家左手中指同無名指用力時會感到前臂拉住拉住痛！
之後我都無再爬，另一個意外發生在阿華身上！

阿華，一名硬漢子，ceiling 王！
佢雖然遲到，但都好勤力，去試爬samy 條紅tape ceiling 線，
第一次on sight 出唔到ceiling，佢無放棄，
休息咗一陣，又上場，今次都係top rope，
彼德做belay，當阿華在ceiling底出到一半時，
條主繩其實已經俾ceiling上面兩個大hold頂住，
因為俾唔到繩，間接妨礙阿華繼續爬，
最後當阿華係ceiling底fall時，因為條繩拉長咗，冇得tension，
所以佢整個人被拋擲向圓柱體牆上，
佢都醒，用雙腳頂住幅牆，保護個頭冇撞向牆上；

但點都估唔到，有人爬緊條圓柱體，
正確d講，應該係班友仔拉緊咗條繩係圓柱體底下吹水，
阿華避開咗一劫，但另一劫又到，
當佢雙腳推開牆時，條頸被吹水人條繩卡住，
而佢受到地深吸力影響下，整個人急速下降，
條頸一路被條繩卡住，繩與皮膚磨擦產生高溫，
仿如一把屠龍刀架在阿華頸上.....

就在千鈞一髮，我，“石磨男”奮力躍出右腳side kick 連環踢向吹水三兄弟，
把佢地條繩立即離開阿華條頸，
另外，彈指間，我使出一記飛鷹龍爪手，
單臂抽起重達二百餘斤彼德，連人帶gri gri 飛到男更衣室門外數米，
方能把阿華從山上跌勢硬生生的停住，
免他撞向地面重傷不起！

但阿華頸上已經有一條長達兩尺血淋淋，深可見骨的傷痕！

風聲鶴唳之夜.....

龜苓膠

昨天放工後走咗去公司後面條街，到一間叫“蘭苑饎館”既中式飯店。其實有時放食晏時都有經過，雖然無入內食過飯，但都知道呢間嘢出晒名d龜苓膏掂，意思即係價錢超貴！

當時大約傍晚六時，飯店地方不算很大，但勝在光猛乾淨，因為該店位於一處住宅區內，店外很少行人經過，但反觀店內就人頭湧湧，有八九成客人！近~~

我一條人入內，坐在門口一張八人圓枱，背向大門口，一心入內食龜苓膏，因為近月我臉上出現皮疹，西醫久治不好，只好試一試中醫內服，清除體內毒素。坊間有傳，呢間龜苓膏有奇妙療效，我不妨一試！

龜苓膏我平時都有食，
最貴都係食過海x堂五草野既龜苓膏。
打開menu，發現人家係賣緊一d叫龜苓膠既野，並不是龜苓膏！
仲有以下六種咁多：
正宗古法 $25
祖傳祕方 健體強身 $30
去濕解毒 $48
主治皮疹 $90
辟毒防癌 頑毒救星 $230
特級精製 $500

我就試咗$90果隻，眼見四周，都有一兩個人食緊龜苓膠，其他人就食中式飯餐。

很快就有一盅黑麻麻既“嘢”放係面前，除了呢盅“嘢”外，仲有一杯清水，平時食龜苓膏時，我喜歡加入糖水，但為了加強藥力，要原汁原味品嚐$90龜苓膠，所以我決定了齋食唔加糖水。

但原來除了加糖水外，該店食龜苓膠時也可以加鹽一起食，效用為有助於帶起藥性，對於燥熱氣，濕氣重所帶起之味覺不適，尤其有效，並品嚐到金錢龜膠獨有之甘甜藥味。

講番果盅“嘢”，size唔算大，相比海記，可以講係細盅。待應連同一隻碗仔俾我，佢問都無問就幫我用隻湯匙搞爛d龜苓膠，然後倒咗三份一落隻碗仔度，我一望落去，見到碗仔內是一些糊狀黑色物體，當我食咗第一啖時，就知道點解d食龜苓膠既人食得好慢，有d似品神咁款！事關真係好難食，味帶強烈中藥，包含了苦同酸味！問你死未？

食完一啖，真係要強行運氣調適一番，久久才能平服心口一鼓悶氣！每食一口，都係人生交叉點，食好唔食好？話晒都俾咗$90，無奶油食兩啖就走，所以一於頂硬上，同其他龜苓膠戰友一起品神~~ 一碗食完再倒一碗，食完之後再倒一碗，足足食咗三碗，隻碗雖然唔算大，但足夠我食咗半個鐘！真係睇唔出果盅嘢細細，但可以分出三碗，“近”....難食呀~~

食完之後拿拿聲跑去KP爬石，嘩！冇人？只得AMY，MARIA，阿華同SAMY！爬咗四轉，第一條熱身LEAD條6C，之後玩咗條白色TAPE同黃色TAPE，條白色超揸力，但都叫做A咗上去！但係條黃色就真係無能為力，點都拆佢唔掂！

Samy 話照佢睇呢兩條線都係7a+左右，嘩，唔係嘛，高手真係高手，set d 線都難過人！除了耐力外，locking power 都唔少得~~我都係未夠班玩呢味線！鞋~~

當晚爬完石超肚餓，所以我提議去食餐飽，咁就去食咖哩啦，嘩，好飽呀，大大碗飯，多多咖哩汁！

不過我傍晚先食完龜苓膠，但晚飯就食咖哩，咁樣相沖法，應該食咗$90 龜苓膠都冇用，浪費~~哎呀，返歸途中仲搞肚痛......廁所呀~~
石佬